Monday, May 26, 2014

Lupa' Sug Bangun Kaw! (Wake Up, Sulu!)

The Town of Jolo.


The Following Poem, written by Rizza May, is an entry to the "Pusaka sin Kamaasan Tarasul Contest" of the I Love Sulu group in Facebook.

This Tausug poem or "Tarasul" is written in the correct orthography of the Bahasa Sug, the language of the People of the Current, the People of Sulu.

***

"LUPA’ SŪG BANGUN KAW"
Rizza May


Lupa’ Sūg bangun kaw dayng ha kalammahan,
Ayaw namayan magpasād sin ngān katamakan,
Bukun na kaw biya' sin nakauna yadtu liyabayan,
Dugaing na in kahālan makahansul pangatayan,

Lupa’ Sūg bangun kaw dayng ha kamudāratan,
Upihi in tahun limabay waktu Kastila’ iban Milikan,
Sambat da sin magpamūng wala' kaw kiyarapatan,
Hangkan balikan in kāina tagna' timpu sin kamāasan.

Lupa’ Sūg bangun kaw sabab sūng na kaw maligad,
Ukaba in mata taynga mu ayaw kaw magpasād,
Hiynang na kabubugaan dayng ha gimba pa higad,
Wayna likawanan daran na sadja in dugu' naaasag.

Lupa’ Sūg bangun kaw bukun na kaw biya' tagna',
Bang upamakun bay malubu na kaw tuud tagha',
Ayaw na magpatural bukun nasa kaw yan pūlna',
Mataud na in lamud bang timakdil sayul nangka'.

Hisiyu in subay magpalindug kaymu dayng ha kasu'duyan?
Amun sila manga laggu' tiyan nagnanakura' duun hayan,
Bukun in hinangun nila magdaya magpalingkat kabāyan,
Pasāran in raayat binsanaun nila kansangan.

Hariin na in manga nagguguwal gagandilan?,
In manga sila hālul-akkal bāyan-buddiman,
Mahita' wayna kubbut nagbuta-bisu sin kahālan,
Piyasāran in hula' piyaglummu' piyangidnapan.

Amuna ini in piyagbantug pa katilingkal ālam?
Wayruun kunu' kiyarapatan dayng ha Kastila pa Milikan,
Sumagawa' bang ha kira-kira ku biya' maiyan putingan,
Sabab malayu' na tuud in Lupa’ Sūg sin liyabayan.

Huw-un bunnāl in Lupa’ Sūg hula' sin manga gagandilan,
Sā' ha bihayaun hula' na sin manga tau bugaan,
Mataud na in piyagtasak sin satru' ha umbun-umbunan,
Sagawa' wayruun hangsulag in tumindug pa pantayan.

Ayaw na magtūg-tūg magbisu-bisu sin kasabunnālan,
Tagnai na bulata in mata pangatud-ngaturan,
Atulihi in taynga bat kadungugan in jimatu kahālan,
Matayma' mu iban sin diy' amu yan in kimugdan.

Lupa’ Sūg bangun na kaw bihayaun tagna',
Nalukat-lambing na in raayat manga mānusiya',
Wayna buli rapat magbalik pa in kahanung sin hula',
Bang kaw ri'pa mamikilan mataud na tuud majūljana'.

Lupa’ Sūg bukun aku missara bihaini bat in aku bukun malasa,
Sagawa' di' aku mabaya' magbuta-bisu na sadja,
Bang sadja awn gaus kapatut ku iban kawasa,
Huminang aku rān bat in kahālan mu mapinda.

Manga nagnanakura' sin Lupa’ Sūg bati' na kamu,
Ulangig sin manga raayat andu' kailu dunguga niyu,
Bukun kamu na sadja in magpalaggu' sin tiyan maamu,
Haataya niyu ra in kapatut namu' duun ha kawasa niyu.

Bangun na kamu manga nakura' sabab in kamu natutūg,
Nagpaamu-amu kamu ha kantil kutsun nalilissuk,
Malayngkan in siyapahan niyu yan magpaintul sin Lupa’ Sūg,
Sumagawa' putingan kamu nakalandu'-landu' tuud.


***

What can you say about the poem?

No comments:

Post a Comment